الاوقات اللي بقضيها لوحدي عماله تزيد , فراغات بيني و بين الناس , بيني و بين الحاجات و بيني و بين نفسي
نفسي
و نفسي دي بقي حكاية لوحدها ,مع اني في الفترة الاخيره معرفش غيرها أو نقول مبكلمش غيرها حاسة إني عماله استغربها ..عارف لما تكون ساكن مع شخص في حاجه كده زي اوضه مقفولة عليك و الشخص ده كل يوم يلبس وش لحد ما في وقت بتشك انك عايش مع شخص واحد ...أو انك عايش أصلا ؟؟؟
عارف لما تتوه في طريق منتش مستمتع بيه حاجه كده شبه التور بتاع عم جاهين عمال يلف و يلف و عمره ما بيوصل ...
الطريق
عارف لما الطريق و التوهه يكون مالهمش معني مالهمش طعم , عارف طيب شكل الغربة بين الناس و الوحده وسط الزحمه و الدوشه ,و الجري و أنت مش عارف ليه؟؟ مستعجل علي ايه ؟؟ يعنى هتوصل فين و ان اتاخرت ايه اللي هيحصل
زمان و مش زمان اوي لما كنت بتوه عمري ما كنت بازعل, بحس ان عيني بتجدد نفسها , انا بتوه كتير و كل مره باوصل بعد ما اكون اتمشيت شويه و شفت حاجه جديد كانت التوهه كل مره ليه طعم جديد ليها شكل المكان بتسيب ذكري و حلم و امل ان الزياره تتكر... بس دلوقتي بقيت اخاف اوي لما اتوه و مبقتش متاكده اوي اني في الاخر هوصل....
الزمن
حاسه ان سني بيزيد و عمري غصب عني بيكبر و انا بكره لما الحاجات تبقي غصب عني . . . السن ده الطريقه الوحيده اللي الزمن بيغلبنا بيها دايما, ممكن نستمتع بالوقت لفتره طويله فبشكل ما بنغلب الزمن بس حتي الوقت ده اللي احنا بنستمتع بيه بيسحب من رصيد عمرنا صحيح بيزود حاجه علي زكريتنا و سعات بنشوف الزكريات الحلوه دي علي انها دليل علي ان الوقت مخبيلينا شويه زكريات تانيه و سعات الزكريات هي هيها يتبقي كائنها مطلعه لنا لسنها و بتقول مش راجعه تاني....
