هي الناس دي بتنام ازاي باليل؟؟

هي الناس دي بتنام ازاي باليل , لما كنت باسمع عن الكوارث اللي بتحصل في مصر و الناس اللي حقوقهم ضايعة من ساعه ما اتولدو كان بينط في دماغي كام سؤال صعب, بس كان اصعب واحد فيهم الناس دي بتنام ازاي باليل , نفسي كان حد يجاوبني , كان حد يقولي لما واحد زي ممدوح إسماعيل يدخل بالليل ينام بيعرف؟؟ هنقول اخد منوم و ظبط نفسه ؟؟ طب ايه ظروف الاحلام ... بيحلم بايه؟؟ بناس بتصارع الموت طول الليل ؟؟ بأم ماسكه جثه ابنها طول الليل ؟؟ نفسها تدفنه في الارض و ميكلوش السمك؟؟ طب الراجل محافظ القاهره ولا النائب بتاعه ؟؟؟ بيعرف لما يغمض عينيه ميشفش صخرة الدويقه بتقع علي دماغه زي الناس الي ساوتهم بالارض؟؟ طب هي الناس بتحلم اصلا, عندها حاجه جواها بتوجعها؟؟ طب بيحبوا ولادهم؟؟ بيعرفوا يخدوهم في حضنهم من غير ما يخافوا.

حاجه مهمه اتعلمتها من ساعه ما وقعت في حب الامومه عن طريق سيف اخويا.. هي ان الحب الكتير بيجيب وجع؟؟ يعني زمان كنت بازعل لما اشوف طفل شوارع و لا طفل بيتوجع لأي سبب.. دلوقتي بحس بوجع لمجرد اني اشوف سيف مكانه... على كده الناس دي معندهاش عيال تخاف عليها و لا حب بحق و حقيقي يوجعهم...