اكتشفت :
انى بعيش عمرى فى دوارات قصيرة, من الحد لخميس و من الساعة 8 للساعة 5 ومن اول الشهر لأخره, بتلهى فى العد و اتلخفن فأكتشف ان 12 شهر عدو و انى كبرت سنه و ان حاجات كتير من اللى طول عمرها موجوده لسة موجودة و ان ليستة الحاجات اللى عايزة اعملها بتتنقل تقريبا كاملة للسنة اللى بعدها
اكتشفت :
انى اجبن كتير من ما كنت فاهمة و ان ياما فى حاجات مصدقة فيها و مبعملهاش, و انى نفسى قصير اوى و انى المفروض ابطل استنى . انى مرهقة و تعابانة و انى معظم الوقت زعلانة و عندى اسباب وجيهه كتير بس برضه عندى اسباب غير وجيهه و ان الزعل شىء مهلك و مرهق جدا
اكتشفت :
انى كل يومين اضيَّع حاجة مش بس الايام و العمر , بس حاجات تانية, حاجات صغيرة و تفاصيل بعد فترة بتحسسنى انى معرفنيش, اكتشفت انى مهووسة بالتفاصيل اصلا
1 comment:
مواويل
جمع..وطرح
كان ياما كان
كنت زمان باحلم بالحمص .. والرمان
والناي واللمة.. والأحضان ,
كنت باحبك ..
وباحب النيل والليل والشعرة ف ديل الخيل
والميل على كتفك.....والمواويل
كنت صحيح بارتاح على صدرك
أرضع منه الطيبة, وكلمة ود..ورد الشوق بالشوق.....وسلامك
كنت باعيشك
وباشوفك,,وبانامك
ومنامي _حلمي_ كان دايما عشه ف حضن منامك
كنت بالملم كل طروف البسمة التايهة .... واغزلهالك
لكن فجأة
فجأة لقيت النيل متعكر
كتفك حجر
لبنك ....مرر
مررتيني... جرحتيني ...
نزيتي من كل جروحي..نزفتك دم اسودت كوره البيضا وكوره الحمرا ..
حتى بواقي صفايحه.................صدت
فضيت منك كل عروقي
ايه صابك؟
خرفتي ....؟ شختي والا فسختي كل عهودك..؟
هو السوس لو ينخر عودك ..مين هايعودك .........................غيري ....؟
لكن ؛
حتى بعد ما فضيت منك كل عروقي
لقيتك انتي .......... عروقي
يا تفوقي ......يا تهيلي ترابك فوقي
وقالوا زمان :
كل حياة سرها في الميه ,
والميه جايه من نيلي ,
والنيل حالف عالفيضان ,
والفيضان خد مني عيالي ,
والعيل ميت ........ عطشان ,
وقالوا زمان :
واحد زائد واحد يطلع كام ؟
طب واحد جمعوه على همه .. يطلع كام ؟
طب واحد طرحوه من أمه ......................يفضل كام ؟؟؟؟؟؟؟؟؟؟؟؟؟؟؟؟
يفضل كان ياما كان
كنت زمان باحلم
كنت زمان
خالد علام
Post a Comment