هل انا هبله بما فيه الكفايه

بقالي فتره بفكر في جمله كل واحد دماغه مريحاه؟؟؟ يعني أنا مثلا مصدقه في دماغي و حاسه ان دي ميزه انك تصدق إن دماغك هتوديك المكان الصح؟؟؟؟بس في سوءال مهم , هل لو عندنا الفرصه اننا نشوف نفسنا بعين تانيه, بعين أي حد غيرنا الي أي مدي الصورة اللي هنشوفها هتعجبنا ؟؟؟ ساعتها تفتكروا كل واحد دماغه هتبقي مرياحاه ؟ كام حاجه هنغيرها ؟؟؟

طب لو عندك الفرصه انك تسمع افكار الناس, مش عن كل حاجه كفايه بس رأيهم فيك, تصور لو عرفت دلوقتي و انت بتعرض أفكارك و في اللحظة دي و مع الناس دول و تحت الظروف دي هما شايفينك ازاي ؟؟؟ يا تري كام واحد هيحس انه اهبل و كام واحد دماغه هتفضل مريحاه؟؟؟؟

طيب ليه ساعات بشوف نفسي جامده اوي و بفهم جدا و سعات تانيه مبعرفنيش و ميعرفش مين اللي بتعمل الحاجات دي ؟؟ يا تري ممكن نعمل حاجه و لما نيجي ندورلها علي المنطق اللي جونا اللي وراها منلاقيش او منصدقش ان ده ممكن يكون جوانا ؟؟؟ ان ده احنا ...؟

ساعات احس انه انا مقسومه نصين نص اهبل و نص جامد و دماغه مريحاه , او علي الاقل عارف ايه اللي مش عاجبه في النص الاهبل الغلس العندي ده...

طيب ليه ساعات بحس باحساس بنوته صغيره راحت الملاهي مع راجل كبير و وقت ما كل اللي بتفكر فيه هوا اللعب و التنطيط, الراجل الكبير اللي غالبا هيكون بكرش بيقرر ميعملش أي حاجه في الملاهي غير انه بس يدخن و ياكل؟؟؟

طيب ليه ساعات بحس ان الرجاله كلهم كفاءة في إنهم ميركبوش البنات مراجيح , مع انه ممكن يركب معها و يشوف قد إيه الملاهي احلي من فوق, يمكن ساعتها يعرف ليه البنات دايما بتحب تركب مراجيح....

طيب ليه الرجاله مبيصدقوش ان غزل البنات ده اختراع غير وجه البشريه و فتح افاق جديده ,و ان كل حاجه في غزل البنات عبقريه من اول اسمه لغايه شكله و اني دايما لما اجيبه لازم اغني اللعب اللعب ....ليه مبيعرفوش يشوفوه علي انه سحابه سكر و سعات كمان بتكون ملونه؟؟

طيب إيه المشكلة لما اشوف إني هبله , عارفه ده كويس و مرتاحه لهبلي اخر حاجه , يعني هما كانوا العقلين اخدوا ايه من عقلهم, ايه المشكله لما ابقي عارفه اني صغيره و معرفش حاجات كتير و مبقاش قادره بجد احكم اذا كنت بتتضحك عليا و لا لاء , ان لسه في حاجات كتير معرفهاش و ان نص معلوماتي عن الدنيا عرفتها من كتاب أما هذه فرقصتي أنا, و اني مش مستعجله اوي علي الباقي و لما تيجي المعرفه دي ده مش بالضروره معناه اني هبلي هيقل و لو شويه صغيره, و ليه دايما لما بفكر في الهبل بيجي في دماغي البنات و السكر و الدلع؟؟؟؟