نجلاء

نجلاء خلاص هتتجوز و بكده اكون الحمد لله جوزت تاني بناتى و الباقي انشاالله انا وراه بس ده برضه ميمنعش اشوف نفسى فى السكة, الاول كانت ايناس و دلوقتي نجلاء , علاقتي خاصة جدا بأيناس و على الرغم من انها صاحبتنا كلنا بس برضة كانت صاحبتي لوحدي , نجلاء بقى حاجة تانية مضفرة في شريط زكرياتي, جزء من ماضي مشترك بيفكرني دايما بأحلى الاوقات .

            تبداء معرفتي بيها من الاعدادي يعني من حوالي 12 سنة كتير قوي على فكرة و الى جاي هنا هوا رصيدنا المشترك انا و هي و ايمان ابراهيم . محدش يعرف قيمة انك تاخد دروسك مع صحابك و لا ان مدرسينك فعلا يتعاملوا معاك على انك من ولادهم , أ. أشرف رياضة عشان كان فية استاذ اشرف عربي , الدرس مع ا. اشرف رياضة يعني نجلا ء تقوله هوا حضرتك مبتحسش فيضحك لانه عارف انها متقصدش و لما ايمان ابراهيم تغلط بيبصلها بس و هي وشها يحمر و تقوم معيطة , يعني كل يوم نخبى العصاية و هوا يجيب العن منها يعنى احنا اصلا مكناش بنضرب عشان شاطرين , يعني لما اكون عندي كحة يروح يجيبلي ورق جوافة و يقولي قولي لمامتك تشتريلك من ده , يعني الدموع اللي في عنيا دلوقتي عشان ملحقتش اسلم علية و يعني الفاتحة اللي بقرها كل ما ادخل شارعه و عيني اللي مش قادرة لسة تبص على المدخل اللي ياما لعبت فيه.

الاعدادي يعني استاذ اشرف عربي و الضرب اللى اخدناة منه مره عشان لابسه قط و مره عشان بنضحك و مرة نطرد لوحدنا و مرة نكتب درس 20 مرة فاكتبة سبعة بس و يعني اننا كنا اشطر تلاته عنده و اعند تلاته عندة , بس ده ميمنعش جرينا و لعبنا  و الفول الحيراتي و الزبادى اللي بالفواكهة.

الاعدادي يعني اغلس مدرسة في التاريخ و على الرغم من كده يعني الهروب من الحصص و اللعب في ضهر الحوش و الطوب اللي كنا بنحدفة على المدرسين يعني لعبة زؤوا يوم الخميس و العرض الرياضي اللى على اغنية ليلة يا ليلة.

ثم الثانوي يعني اول مره نتفرق كده في تلات فصول و عيال غلسة نكتشف بعد شوية انهم مش غلسين قوي ولا حاجة. يعني الدار و يوم الخميس و طقس يوم الخميس يرجع للاعدادي برضو و هو لب و حمص الشام بعد الدرس . يعني ابلة جيهان بلهارسيا و ابلة اليس اللي كنا بنط من الشباك في حصتها لما تضمها على الفسحة , يعني مستر خالد و هما عارفين الباقى لانه مش كلة يصلح للنشر و الابلة عمرو دياب و حبستنا في تلتة اول علمي و الدروس , ابراهيم مطاوع يعني الكشري و البلطجة و الردود اللي عمري ما كنت اتصور اقولها , محمد محرم و ليلة الخميس الوردية, يعني الثانوية العامة و الاندال اللي جابو هما الاتنين 98 % , يعني اول مرة نروح وسط البلد لوحدينا و لو يعرفوا ان لسة عندي النوت بوك اللي جبتها يوميها . يعني عبدة سيرميكا و درس الكيميا و درس الاحياء يعني اتوبيس ابو اسامة و ميل جيبسون اللى كل ما اشوفة احس انه لسة فاكرني و النشيد القومي شبرا و بنات شبرا,طب فاكرين لما كنا بنتأخر صحيح انتوا مبتتاخروش كتير بس فاكرين لما استاذ عاطف اخدني رهينه ساعة لما كنا بنط السور لما كل العيال نطت و انا مطولتش فمعرفش يقفش غيري . فاكريين لمل كنا بنهرب من المدرسة في تطور طبيعي للهروب من الحصص و نروح بدرى مع سنة تالتة , فاكرين الحوش لما كنت باجبركوا تقعدوا في الشمس طب فاكرين واحنا شحطه كده لما كنا بنلعب صيادين السمك . فاكريين لما كنا بنروح الجنينة طيب حفلات الجامع و ابداعكم منقطع النظير  .

نجلاء يعني الايام اللي راحت و عمرها ما هترجع تاني يعني الخروج و الكشري يعني تيمور و شفيقة و اول يوم العيد و صلاة العيد اللي بروح منها الضهر و مؤمن اللي هوا اكل بجد و كل انواع السندوتشات اللي ممكن تضرب و شعري اللي كنت لازم اعملة كيرلي , يعنى الافيهات اللي ملهاش لازمة و مبتضحكش غيرنا , يعني صوت ضحكنا العالى اوي, والالش قبل ظهور الالش اصلا , يعنى المدخل عند ايمان و الانتريه عند نجلاء او ايناس .

ايمان ونجلاء يعني اول ناس بدور عليهم في الفرح و الحزن , يعني اكتر ناس بتوجع لوجعهم و اكتر ناس بضحك من قلبى معاهم و اكتر ناس بحبهم , يعني النعمة اللي بحمد عليها ربنا .

يعنى قد اية انا عارفة ان ممكن كل ده ميرجعش تاني بس مبسوطه انه كان معاكوا.يعنى الاحلام اياها و الحكايات اللي مبتخلصش يعني عمرنا اللي بيجري و عمال يعلم فينا و يثبت لنا اننا بنكبر و احنا عمالين نعند علية و ماسكين في بعض بأيدينا و سناننا , يعني الوجع اللي جوايا اللي بجد و اد اية انا بكرة الجد:(

ملحوظة : انا مستعدة اعمل واحدة زي دي لايمان لو ادت زهزودتي فرصة تانية او دكر تاني يعني
ملحوظة تانية : كل اللى مكتوب فوق ده حصل بحق و حقيق ايوة
ملحوظة تالته: انا مش عارفة اقفل النوت دي كل شوية اغيرها