اسباب وجيهه للفرح

بقالي فتره في حاجات كتير مش بسطاني و انا عماله ادور وسط الناس و الايام اللي شبه بعضها علي حاجه تفرحني و لقيت الحاجات دي...
بفرح لما...
حد من صحابي يجيلي من غير ميعاد, عاده بتكون ايمان صحبتي , بتعدي عليا و معاها حاجه حلوه هي عارفه اني بحبها " ايس كريم ويتش فانليا" , احلي حاجه في ايمان هي ضحكتها , بتيجي تنور حاجات كتير جوايا و بعدين بتمشي, و انا عارفه انها دلوقتي زعلانه من جواها و بحق و حقيق صحيح مفيش في ايدي حاجه اعملها بس بجد نفسي ازغزغها لحد ما تموت من الضحك....
بفرح لما...
اشتري كتاب جديد و يعجبني و باحس اني قابلت حد جديد و بفرح لما اقري اي جزء من اما هذه فرقصتي انا و احس انه مش انا بس يعني اللي كده و كده دي حاجه حلوه علي فكره, وان في امل في رقصه تكون بتعتي لوحدي
بفرح لما
الاقيه يجري عليا من غير ميعاد و من غير لما يكون عايز حاجه, يحضني اوي و يقولي بحبك, بحس الدنيا بجد منزوعه الاحزان كامله الفرح...
بفرح لما
اروح كشري التحرير مع ايناس و افتكر انا و هي كل المرات اللي جينا فيها, بفرح لما اروح معاها حته غريبه و نعمل حاجات اغرب, ذي يوم الصاغه و يوم التربيعه و يوم ما روحنا السيده و فطرنا عند بشندي و يوم ما روحنا نشوف العفش و هي عارف اليوم ده كويس , بفرح بس لما افتكر ان في حاجات من دي انا لسه قادره اعملها و بفرح لاني عارفه ان شويه الحكايات دول هما اللي بقينيلي و عارفه احافظ عليهم...
بفرح لما
منير يفاجئني باغنيه و كانه بعتلي رساله في الراديو في التلفزيون في الشارع, ساعات الاقيه قدامي حته و لو في رنه موبيل , بفرح بالحاجات الحلوه اكتر لما تكون من غير ميعاد....
بفرح لما
اعمل حاجه كويسه و ابقي راضيه بيها عن نفسي, بفرح كمان لما الناس تقول عيا بلطجيه لان ده معناه اني اختياراتي حره و اني عارفه ادافع عنها...
بفرح سعات لمجرد اني قررت ان كفايه زعل كده و ادور علي اي سبب يفرحني و بابقي واثقه اني هلاقي اسباب للفرح

هى كانت نود قديمة حبتين في الفيس بوك بس نفسى لقولها تانى