خوف

في حاجات بنبان قدمها صغيرين اوي , احلامنا و اكبر مشكلنا و حكايتنا اللي مبتكملش, كل ده بيبان تافه و صغير و بتحس نفسك اد ايه انت عبيط اوي و اهبل . زعلان على ايه , ايه اكبر حاجه مضيقاك يعني

لما ايمان صاحبتي مامتها ماتت شفت أي حاجه مضيقاني على انها تافهه اوي , شفت اكبر همومي و لا حاجه, يعني انا باكبر مشاكلي ممكن استحمل خسارة زي دي...؟؟؟ المهم اني عارفه كويس أوي إن ربنا لا يكلف نفسا إلا وسعها بس غصب عني بخاف, أصل إيمان صاحبتي بابها كان توفى قبل مامتها بكام سنه و برضه ساعتها قلت اكيد ايمان مش هتستحمل بس الحمد لله ربنا قدرها قبل كده زي ما قدرها دلوقتي و بقت هي مسئوله تماما عن اخوتها ,

طب بقى الناس اللي كل يوم تخسر واحد؟؟؟

تفتكر يعني لما أم تخسر ابنها الاولاني خسارة التاني هتبقى أسهل, طب هي كام أم ممكن تتعامل مع الموضوع على انه مش خسارة ,

 الموت و ثقافة التعامل معاه؟؟!!

مره سمعت حد تقريبا كان عبد الرحمن الابنودي بيقول إن استقبالنا للموت بيختلف و إن الناس اللى بجد مبتخفش من الموت ...

أنا بخاف أوي من الموت و مبخافش عليا أنا لوحدي أنا بخاف علي كل الناس اللي بحبهم و بترعبنى فكرة انى اخسر حد فيهم... من كام يوم كده سمعت إن مدرس كان بيديني درس مات ... كان صغير و مفيش حد يغلى على ربنا عارفه ده برضه كويس, هي بصراحه مش اول خساره ليا بس معرفش ليه لاقتنى مش مصدقه و لاقتيني شايفاه في كل حاجه بعملها و لاقيتها تافه اوي و مش حقيقيه . هو عمره ما كان صاحبى مثلا  بس كان بينا حاجه بحق و حقيق . كان بينا خناقه صغيره و كام تريقه كده ... شفت البروفيل بتاعه على الفيس بوك لاقيت كاتب تحت صورته كلمه مرعبه عايز امشي بقى , ولاقيت نفسى مش مصدقه الي شايفاه. البرفيل مليان صور و خروجات و زيه زي البروفيل بتاعي مثلا . اترعبت و لاقيتي ميّته في جلدي . انا عارفه ان مش كويسه اوي مع ربنا ,انا يمكن زفت كمان, تفتكروا لو انا مطمنه علي نفسي ما كنتش خفت كل ده ؟ طب هوا فيه حد مطمن اصلا, مره قريت كلمه بحق و حقيق أوي انه العبد ما بين الخوف و الرجاء  يعني عادي ان اخاف بس ابقى مستنيه من ربنا انه يغفر لي, عارفه انه في فكره ساذجه من نوعية ليه يعني هوا احنا بنعمل اية؟؟ يمكن لو قلت زيهم اننا فعلا مبنعملش خطايا كبيره يعني بس احنا مبنعملش أي حاجه تانية يعني ايه يعني بنشتغل , يعني إيه يعني اكبر انجازاتنا... طب نعمل إيه؟؟؟ و اللي هنعمله ده نلاقيه فين؟؟؟

مره سمعت اوبرا وينفري  و هي كانت بتاخد جايزه عن مجمل اعمالها اسمهاLife Time Achievement   كلمة كبيره اوي برضه و مرعبه , بس في كلمتها في التكريم ده لاقيتها بتقول انها طول عمرها كانت بتدعي ربنا: و تقول ؛Please God Use me  , عمرو خالد كمان في مره قال دعاء كنت تقريبا مبقولش غيرة و أنا ساجدة فى رمضان و هو " اللهم اجعلني ممن يعملون الصالحات" مكنش قصده اننا نعمل حاجات كويسه زي الصلاه و الصوم بس كان قصده فكره اكبر اعمار الارض , كلمة كبيرة برضة و مرعبه .

مره واحد سألني ايه اكبر نعمه ربنا ايدهالك ؟ قلتله التعليم . سعات بخاف أوي من علامي و بخاف أوي من إني عارفة . التعليم برضه مسئوليه باستغرب جدا من الناس- اللي أنا سعات باكون واحدة منهم – اللي بيتباهوا بتعليمهم و أقول لنفسي مجانين دول؟؟؟ مش عارفين قيمة الحمل اللي شايلينه على ضهرهم. ربنا اداني دماغ نضيفه و بعرف أشوف كويس بس برضه دي على قد ما هي نعمه علي قد ما هي حاجه مرعبة ...

عارفة ان الاسئله دي من اكبر الاسئله بس أصل الخوف شيء مرعب و الموت برضه بس المفروض يخلينا نعيد حسابتنا تاني...

لو باتمنى حاجه ... بتمني قلبي يكون متعلق بربنا ... بربنا و بس.