الالاختيار و الحب
امبارح اتسالت سؤال بجد معرفتش هوا صعب اد ايه غير لما اتسالته
اختار ايه الحب بكل الحاجات اللي مش مظبوطه اوي ولا اختار العقل و الحاجات المظبوطه
صحيح انا مستعده او هكذا اقول اني اتجوز و اعيش من غير لا حب و لا حاجه بس انا عارفه في قرارة نفسي - حلوه قرارة - ان ده كما يطلق عليه البعض قصر ديل بس انا لسه مصدقه اني ممكن برضه احاول في الحوار ده
امبارح بقى لاقتيني بختار الحب لاقتيني شليفه واحده صحبتي مبسوطه و اول مره بتقول بتحب لاقيتها مكسوفه و بتعيط
لاقيتها بداري اسمه و بتروح بدري عشانه و مش قادره تكدب عليه
سواء انا شايفه ان الحاجات دي صح و لا لأ بس ملهاش في النهايه سبب غير الحب
الحب ... الكلمة اياها اللي طول العمر بندور على حد يشاركنا فيها
بيتهيألي من حق الحب علينا انه لما يجيي نختاره
و نحارب و ندور بجد على سعدتنا
الدنيا مش هتستفيد مننا ابا و احنا تعسا
الجواز مش هوا الحب
الجواز سنتين تلاته حب
لأ خليني مقولش اي كلام
الجواز مش كله حب و في حاجات بتعكننه و هتفضل تعكننه سواء اللي اتجوزا دول كانوا بيحبو بعض و لا لأ
يعني النكد جاي جاي في مرحله ما ايه اللي هيحصل لو حسبتها حسبة اني عايزه اكون مبسوطه و انا باكون كده فعلا مع الحد ده و مش مع اي حد تاني يبقى من حقي اعيش معاه مادام مفهيوش حاجه بجد تمنعني و اللي بيحبني بجد لازم يقف جنبي و لازم اكون اجرا لاني بحب
معرفش الكلام شبه اسامه منير شويه بس ده بجد
لو كان الحب حلمي في يوم من الايام يبقى لازم ادافع عنه
لاني كده مش هبقى اى حاجه غير اني جبانه
و الدنيا و كل الناس اللي بيحبوني مش هيستفيدو بيا فيحاجه
و انا جبانه
حاجه اخيره لازم اقوي بجد
No comments:
Post a Comment