مره ايناس صحبتي قالت لمحمود جوزها يشوفلي عريس, هي مش مره الحقيقه هوا كتير بس مره من ذات المرات دي قعدت تراجع معاه كل اسامي صحابه, اللي متجوز و اللي خاطب و اللي يطلع لا خاطب و لا مصاحب تمسك فيه بأيدها و سنانها و تعرف من محمود عنه كل التفاصيل و بعد كده لو لقيته ها ينفع تعقد تتحايل عليه علشان يقوله عليا, سيبك من استماتتها اللي خلت محمود يشك في اصرارها على جوازي و كأن في فضيحه و بتحاول تلمها . و هي بتحذف من ليسته صحابه الناس اللي انا مش هرضى بيهم كانت كمان بتحذف الناس اللى مش هيرضوا بيا و الغريب على اختلاف الاسباب اللي انا ممكن ارفض بسببها كان في سبب واحد انا هترفض بسببه و هوا اني باشتغل
الحوار كالتالي
ايناس : ما تشوف صاحبك اسمه ايه ده؟
محمود: لا مش هيرضى
ايناس : ليه ان شاء الله
محمود : عشان ايمان بتشتغل
ايناس : اههههههههههه , طيب
مش الغريب طبعا ان الاتنين مقتنعين تمام الاقتناع , الغريب هوا الاقتناع نفسه بان الشغل غلط و يمكن حرام الغريب انهم يشوفوا البنت اللى بتشتغل علي انها استغفر الله العظيم
ردا عليهم
تعرفوا ان 30 % من اسر مصر اللي بتصرف عليهم واحده ست. وده مش لان جوزها مات و لا ميقدرش بس لا ده يمكن يكون عايش و بيكسب و مبيصرفش و الكلام ده سنه 2006 يعني اكيد اكيد النسبه دى زادت...!؟
تعرفوا يعني ايه قعدة البيت. تعرف يعني ايه تجاوزات, تعرف حدود للتجاوزات دي؟
تعرفوا مثلا أن البنات في السعوديه بتروح كافيهات و مطاعم و تعرف ولاد عن طريق البلوتوث و المطاعم مفصوله الولاد في حته و البنات في حته. طب تعرف ممكن يحصل للبنات دي ايه لو اهلها عرفت , ايه اللي ممكن يخلي واحده تاخد المخاطرة دي , انا مش بدافع عن ناس بتعمل حاجه غلط بس نفسي نعرف ان الغلط في كل حنه.
طب تعرف في امريكا مثلا ايام الستينات : كانت في حمله عملتها شركات مساحيق الغسيل و الاغذيه لتمجيد صورة ست البيت عشان لما الستات اشتغلت الشركات دى كانت بتخصر و بعد ما كانت الست فعلا بتشتغل و حققت مكاسب. عارف ايه اللى حصلهم . جالهم حاله من الاكتئاب و زادت معدلات الطلاق
طب عارف لما واحده مبتشتغلش و تفضل قاعده مع جوزها بس عشان يصرف عليها ده معناه ايه؟؟ هي حاسه بايه؟؟عارف بتبقى بتبيع إيه قصاد إيه؟؟
عارف يعني إيه واحده جوزها مات و مش لاقيه تصرف علي ولادها... هتعمل إيه؟؟
عارف يعني ايه امبارح يبقى زي النهارده. عارف يعني ايه متستناش فرق في بكره. عارف يعني إيه اكتئاب؟؟؟
بلاش... عارف يعني إيه علام و تفتيح دماغ. عارف يعني إيه اصحابي و زمايلي
عارف إن العفة مكانها القلب .. مش في الشارع و لا فى البيت و لا فى الشغل
عارف إن اللي ممكن يحصل لواحدة راح الشغل هوا هواه اللي ممكن يحصل لواحدة بتودي ابنها للدكتور
عارف ان اللي شبهك هم اللي بيسترخصوا الست اللي في الشارع و ميعرفوش ايه اللي نزلها
عارف يعني إيه بكره؟؟ و يعني إيه آمان؟؟ اللي معدتش في راجل خلاص
حاجه اخيرة ...قريت كل هذا الصوت الجميل الذي ياتي من داخلها
9 comments:
يا ستي
هتلاقي واحد بيرفض واحدة عشان دماغها كبيرة
وواحد تاني بيرفض عشان شخصيتها قوية
وتالت عشان بتفكر
ورابع عشان فيمنيست
وحياة أمي ما بهزر ولا ببالغ
كلها حالات مريضة وكان على يدي
انما اجدع حاجة لما واحد رفض يخطب واحدة
وقال بعضمة لسانه
انا عاجبني دماغها قوي وطموحها حلو جدا وهي انسانة فوق الوصف وذكية وجميلة
بس انا عايز اتجوز واحدة تقعد في البيت وتربي عيالي واكون انا الديك الوحيد اللي بيدن في البيت!!
رجالة عايزة الحرق
ماهو انا عارفة كل الكلام و هتصدقيني لو قلتلك اني كمان مقدراه ... احنا مجتمع بيربي الراجل علشان في النهاية يطلع ديك
بس اصل انا خنقني اوي ان حد يفكر في البنت اللي بتشتغل مش انها متنفعلوش هوا بس انها متنفعش اصلا
يعني يبصلها على ان سلوكها استغفر الله العظيم يعني
وحتى لو اعجب بدماغها وكل حاجة ماعدا حلمه فى الزوجة اللى تحسسه انه سى السيد فبيخفى رغبة الديك المكبوتة وتطلع بعد الجواز لدرجة انه ممكن يقعدها من الشغل
وتنتهى الموضوع بالطلاق
كلهم فى الاخر واحد
وبجد ميعرفوش ان العفة مكانها القلب
ana mewf2ek fy kol kalmek el sara7a .. btw mesh kol el regala betrfod el bent ely betshta3'l w ana wa7d menhom
@asabrin ana 3arfa eno mosh kol elregala bas goze2 kebeer menhom for sorry
نعم
لابد أن يظل الديك ديك والفرخة فرخة وإلا هيختل نظام الكون اللي وضعه ربنا
ولما الراجل يخرج والست كمان الولاد دول هيروحو فين ؟؟؟؟؟ مين اللي هيعتني بيهم ومين اللي هيربيهم
مادام زوجها ملبي احتياجات البيت ليه تشتغل وان كان على تفتيح الدماغ ممكن تتعلم وتقرا وتحضر ماجيستير ودكتوراه كمان لو عاوزه واللي يدايق من نجاح زوجته ميبقاش انسان كويس واللي يخليها تهمل في ولادها برده ميبقاش كويس
وبعدين انتي محروقة ليه كدة وانت عندك الاختيار وليكي انك توافقي تجوزيه وتعدي في بيتك أو لا؟! ولا هو هيجوزك غصب واقتدار
And. M. Z.
حضرتك ما اخدتش بالك من حاجه في الكلام غير تفتيح الدماغ و العلام طب بالنسبة للامان , طب بالنسبه لاني مبعضرتش على رأي حد و كل اللي انا باتكلم فيه انه كون في و احده بتشتغل ده مش معناه انها مش كويسه و انا لا محروقه و لا حاجه
و اكيد اكيد مش هتجوز غصب و اقتدار بس من حقي ارفض لما الناس تفترض لمجرد اختلاف ارائنا اني بنت مش كويسه
ولا ايه؟؟
بالطبع مش معنى ان هي بتشتغل ان هي مش كويسة ياما بنشوف وبنسمع عن بنات جهزت نفسها بنفسها وكلنا مقدرين حاجتها لشغلها وربنا يعينها وكلنا بنشجعها مادام عملها ده عشان إرضاء الله عز وجل وبنسمع برده عن نساء متزوجات سلوكها مش كويس مع زمايلها في العمل في كده وفي كده زي مافي رجال كده وكده
لكن اللي بيضايقني وبيحزني جدا اني بشوف ستات سابت المهمة العظيمة اللي اتخلقت من أجلها وهي الزوج والبيت والأولاد واستقرارهم وتركتها تماما عشان الشغل ومن هنا حصل خلل عظيم لما افتكرت ان المهمة دي فيها طمس لشخصيتها وكيانها واعتبرتها مهمة دون المستوى وفي الحقيقة هي اللي بتربي الرجال والنساء اللي بيبنوا المجتمع كله وعشان الشباب ابتدوا يرجعوا لعقلهم تاني وعلشان عاوزين يغيروا للأفضل عاوزين يجوزوا نساء مؤمنات بأن هذه الأعمال العظيمة للمرأة العاملة في بيتها هي اللي فيعا صلاح المجتمع وهي اللي بيعمها الحب مش انها تخرج وتسيب رسالتها الأساسية اللي اتخلقت عشانها
لا نريد جاهلة ولا جارية ولا خادمة بل زوجة وأما ومربية متعلمة معلمة عزيزة بدينها وأخلاقها
عذرا إن استفززتك في التعليق السابق فلا أتكلم إلا بدافع الحرص وأنصحك بالقبول من ذلك الشاب إن رضيتم دينه وخلقه
شكرا لسعة صدرك
And. M. Z.
و لا يهمك
عزيزه بدينها ... هوا ده, يبقي اللي بيني و بينه ربنا مش حاجه تانيه يعني لو واخد حقه تالت و متلت يقول
و لو حقه ناقص اقول
و يبقي في حاجه بحق و حقيق نحكمها بينا
شرع ربنا و بس
Post a Comment